Түркиянын жана Орусиянын президенттери Режеп Тайип Эрдоган менен Владимир Путин телефондон сүйлөшкөнү белгилүү болду.
Жекшембиге караган түнкү Путин журналисттерге жолукканда Украинадагы түз сүйлөшүүлөрдү 15-майдан тарта жандандыра турганын билдирди.
TRT Haber берген маалыматта Эрдоган Анкара диалог үчүн аянтча түзүүгө даяр экенин ырастап, "тынчтыкка жетүү үчүн мүмкүнчүлүк терезеси ачылганын" айткан. Түркиянын президенти "ок атышууну токтотуу сүйлөшүүгө шарт түзөрүн" белгиледи.
Орусиянын ТИМи Эрдоган Путиндин демилгесин колдогонун билдиргени мененок атышууну токтотуу тууралуу эч нерсе айткан эмес.
Путин менен сүйлөшкөнгө чейин Эрдоган Франциянын президенти Эммануэл Макронго телефон чалганы белгилүү болду.
"Согушту токтотуу жолунда колдоно тургандай тарыхый бурулуш учуру түзүлдү. Түркия тынчтыкты бекемдөө жана ок атышууну токтотуу үчүү үчүн сүйлөшүү уюштурууга даяр", - деп белгиледи Эрдоган.
Ал мындан тышкары Москва менен Киевдин ортосунда тынчтык сүйлөшүүлөрү башталышы керектигин жана Украинаны калыбына келтирүү үчүн Франция менен кызматташтык маанилүү экенин белгилеген.
Путин сүйлөшүүлөрдү баштоо ниетин Киев 12-майдан тарта 30 күндүк элдешүүгө даяр экенин айткандан кийин билдирген. Бул сунуш Кошмо Штаттар жана Украинанын европалык өнөктөштөрү тарабынан колдоо тапкан.
Украинанын президенти Владимир Зеленский эгер Орусия ок атышууну токтотууга макул болсо сүйлөшүүлөргө даяр экенин айткан. Бул билдирүү Польша, Франция, Британия жана Германиянын лидерлери Украинанын борборуна баргандан кийин жасалды.
АКШ президентинин Украина боюнча атайын өкүлү Кит Келлог жекшембиде ок атышууну токтотуу, андан кийин сүйлөшүүнү баштоо схемасын колдоду.
"Трамп бир канча жолу айткандай, адам өлтүрүү токтошу керек Адегенде ок атышууну отуз күнгө токтотуу керек, андан кийин гана тынчтык сүйлөшүүлөрүн баштоо абзел. Мындан башка жол жок", - деп жазды Келлог Х социалдык түйүнүнө.
Украинага жүздөй учкучсуз учак чабуул койду
Дүйшөмбүгө тараган түнү Украинага 108 орусиялык учкучсуз учак чабуул койду. Украинанын куралдуу күчтөрү 55 дронду атып түшүргөнүн, дагы 30у бутага тийбей калганын билдирди. Жыйынтыгында Одесса, Николаев, Донецк, Житомир облусу жабыр тарткан.
Донецк облусунда жүк ташыган поездге сокку урулган. "Украин темир жолу" билдиргендей машинист бутунан жараат алган. "Элдешүүнү улантууга тоготпостук менен карашууда, душмандын темир жолдун инфратүзүмүнө чабуулдары уланууда" - деп билдиришти уюмдан.
Украина Орусия менен түз сүйлөшүүгө даярдыгын, адегенде ок атышуу токтошу керектигин билдирди
Украинанын президентии Владимир Зеленский Киев атышууну токтотууну талкуулоо үчүн Орусия менен сүйлөшүү жүргүзүүгө "даяр" экенин билдирип, орус президенти Владимир Путиндин түз сүйлөшүүгө чакыруусун согушту токтотуу үчүн "жакшы белги" деп атады. Ал тынчтык сүйлөшүүлөрүн баштоо үчүн адегенде ок атуу токтошу керек экенин белгиледи.
11-майда Зеленский X социалдык түйүнүнө "Орусиялыктар акыры согушту токтотуу тууралуу ойлоно баштаганы жакшы белги. Дүйнөнүн баары муну көптөн бери күтүп жаткан. Кайсы гана согуш болбосун, аны чынында эле токтотуу аракетиндеги биринчи кадам ок чыгарбоо болушу зарыл. Адамдарды өлтүрүү бир дагы күн уланбашы керек. Орусия 12-майдан тартып аткылоосун толук, узакка жана ишенимдүү түрдө токтотушун күтөбүз, Украина жолугушууга даяр" деп жазды.
11-майга караган түнү Путин Украинадагы согушта 30 күндүк тыныгуу жарыялоо тууралуу сунушка макул болбой, анын ордуна Киев менен түз сүйлөшүү өткөрүүнү, мындай жолугушууну, балким, 15-майда Стамбулда өткөрсө болорун сунуш кылды.
11-майдын таңында Орусия Украинанын Киев облусун бутага алып, согуштук дрондор менен аткылаганын облустук аскердик администрация кабарлады. Мекеменин маалыматына караганда, абадан коргонуу системасы иштеп, айрым учкучсуз учактар атып түшүрүлдү.
Жарандык инфраструктурага зыян тийбегенин белгилеген администрация Бровары районунда 71 жаштагы жергиликтүү тургун жараат алганын, ал нес абалда ооруканага жеткирилгенин, Обухов районунда беш жеке үй зыян тартканын кабарлады.